अकोले(देवठाण)सोनकडा–गिऱ्हेवाडी परिसरात विद्यार्थ्यांची क्षेत्रभेटनिसर्गनिरीक्षण, कमळांनी सजलेले तळे आणि जलसाठ्याची प्रत्यक्ष पाहणी

अकोले(देवठाण)_गिऱ्हेवाडी, दि. ११ सप्टेंबर २०२६ : विद्यार्थ्यांना आपल्या परिसरातील निसर्ग व नैसर्गिक साधनसंपत्तीचा प्रत्यक्ष अनुभव मिळावा, तसेच निरीक्षणातून शिकण्याची सवय लागावी, या उद्देशाने जिल्हा परिषद प्राथमिक शाळा मेंगाळवाडी, वरखडवाडी, मेनखिंड व गिऱ्हेवाडी यांच्या संयुक्त विद्यमाने सोनकडा–गिऱ्हेवाडी परिसरात क्षेत्रभेटीचे आयोजन करण्यात आले.

पावसाळ्यानंतर हिरवाईने नटलेल्या परिसरात विद्यार्थ्यांनी विविध झाडे, वनस्पती, डोंगर-दऱ्या, शेती व परिसरातील नैसर्गिक घटकांचे बारकाईने निरीक्षण केले. यावेळी विद्यार्थ्यांनी नैसर्गिक कमळांनी बहरलेले सुंदर तळे पाहिले. पाण्यावर उमललेली कमळे आणि आजूबाजूचा निसर्ग पाहताना विद्यार्थ्यांच्या चेहऱ्यावर कुतूहल व आनंद दिसून येत होता.क्षेत्रभेटीदरम्यान विद्यार्थ्यांनी परिसरातील पाण्याचे मोठे टाकेदेखील पाहिले.

पाण्याचा साठा, त्याचा उपयोग तसेच पाण्याचे संवर्धन याबाबत शिक्षकांनी विद्यार्थ्यांशी संवाद साधला. त्यामुळे जलसंधारण आणि पाणी बचतीचे महत्त्व विद्यार्थ्यांना प्रत्यक्ष उदाहरणातून समजले.

क्षेत्रभेटीचा एक महत्त्वाचा भाग म्हणून विद्यार्थ्यांनी एकत्रितपणे भोजनाचा आनंद घेतला. निसर्गरम्य परिसरात मित्र-मैत्रिणी व शिक्षकांसोबत भोजन करताना विद्यार्थ्यांमध्ये आनंदाचे वातावरण निर्माण झाले. सामूहिक भोजनातून विद्यार्थ्यांमध्ये सहकार्य, शिस्त व सामूहिकतेची भावना दृढ झालीया क्षेत्रभेटीत विद्यार्थ्यांनी प्रश्न विचारले, परिसराचे निरीक्षण केले आणि विविध अनुभवांची नोंद केली. पुस्तकात शिकलेल्या संकल्पना प्रत्यक्ष परिसराशी जोडण्याची संधी त्यांना मिळाली. निसर्ग हा केवळ पाहण्याचा विषय नसून त्यातून शिकण्याचे एक जिवंत पुस्तक आहे, याचा अनुभव विद्यार्थ्यांनी घेतला.

या उपक्रमामुळे विद्यार्थ्यांमध्ये निरीक्षणशक्ती, जिज्ञासा, वैज्ञानिक दृष्टिकोन, पर्यावरणीय जाणीव, जलसंवर्धनाची भावना आणि निसर्गाविषयी संवेदनशीलता विकसित होण्यास मदत झाली. क्षेत्रभेट विद्यार्थ्यांसाठी ज्ञानवर्धक, आनंददायी व संस्मरणीय ठरली.

क्षेत्रभेटीत मेंगाळवाडी, वरखडवाडी, मेनखिंड व गिऱ्हेवाडी या चारही शाळांतील शिक्षक व विद्यार्थ्यांनी उत्स्फूर्त सहभाग घेतला.